觀看更多照片
2024-04-25
【簡介】為台灣受難ê王育霖先生，m̄-nā是維持正義ê檢察官，mā是一位有才情ê詩人。為著chhui-sak每年3月14台灣詩人節thang表達對王育霖詩人檢察官ê siàu-liām，mā鼓勵少年人投入台語文創作，特別辦理台語詩徵文比賽。
時間：2024年3月16日（週六）
地點：台灣聖山－生態教育園區
第2屆「王育霖詩人檢察官台語詩徵文比賽」第一名Ông E̍k-khái（王奕凱）
（影片拍攝、剪輯：贊外）
作品：〈Éng-oán ê pō͘-tūi tiúⁿ（永遠ê部隊長）〉
Lí sī pó-pì Tâi-tiong ê siú-hō͘-sîn
76 tang chêng 27 (Jī-chhit) Pō͘-tūi ū lí tòa-niá
Tùi-khòng sat-hāi bû-ko͘ jîn-bîn ê kun-kéng
Kā in ê phài-chhut-só͘ 1 ê 1 ê kong--lo̍h-lâi
Lín piàⁿ-miā tùi-khòng tham-u chèng-koân
Khai-chhòng Tâi-tiong kong-êng ê le̍k-sú
Bû-nāi Chó͘-kok kun-tūi siuⁿ kiông-pō
Pō͘-tūi bô-ta-ôa sóa khì Po͘-lí
Phah 1 tiûⁿ O͘-gû-lân Chiàn-e̍k
Tì-sú lí chē 17 tang oan-óng ga̍k
Soah ōaⁿ lâi khan-chhiú chit-sì-lâng ê thiàⁿ-thàng
Chhut-ga̍k liáu-āu pēng-bô an-ún
Chó͘-kok ê kàm-sī m̄-bat soah-chhiú
Ná chhin-chhiūⁿ mǹg-sǹg
Sûi-sî ē kā lí lia̍h cháu, thâi--sí, koh chhōe bô sí-thé
Sú lâng kiaⁿ-hiâⁿ
40 tang bô-mê-bô-ji̍t thê-hông ê ji̍t-chí
Lí ióng-kám kàu Bí-kok Kū-kim-soaⁿ káng-ián
Kā 1947 ê keng-le̍k kóng hō͘ tāi-ke thiaⁿ
"Bô hō͘ chhèng-chí tōaⁿ sí, to̍h ū sú-bēng kóng 1-sì"
Ū thiⁿ-kong-peh--a pì-ìm oa̍h--lo̍h-lâi
Kiám-chhái sī chù-tēng hó ê miā-ūn?
Ji̍t-pún chiàn-pāi hit-tang-chūn
Lí siōng chi-chhî hō͘ Chó͘-kok chiap-siu
Chheng-thian pe̍h-ji̍t móa-tē âng
Gia̍h tī chhiú--ni̍h hàiⁿ ah hàiⁿ
Kán-ná chhiong-boán hi-bāng, lāu-sîn chāi-chāi
M̄-chai in sī hông chheh-sim ê sit-lêng chèng-hú
Taⁿ, lí í-keng kak-chhéⁿ
"Tâi-oân lâng, m̄-sī Tiong-kok lâng"
Chit kù ōe ōaⁿ-chò lí ê sìn-gióng
Chīn lí ê sú-bēng
Kō͘ lí ê chhiú kap chhùi
Kā sū-kiāⁿ ê it-chhè thòaⁿ hō͘ chiòng-lâng bat
Kin-nî ê 27 Pō͘-tūi Kì-liām Ji̍t
Góa tòe tio̍h lí chham-ka ê siōng bóe pái
Ē-kì-tit iáu tī ka-hō͘ pēⁿ-pâng ê lí
Taⁿ-khí ta̍k tang chham-ú ê chek-jīm
Bô hoat-tō͘ chhin-sin kàu hiān-tiûⁿ
Keng-iû bāng-lō͘ ti̍t-pò chham tāi-ke saⁿ-kìⁿ
Nî-hòe í-keng lâi-kàu 103
Ì-chì iáu sī hiah-ni̍h-á kian-tēng
Chhim-chhim kám-tōng chāi-tiûⁿ só͘-ū lâng
Chit kang chia̍h pn̄g-oân
Sī kì-liām 27 pō͘-tūi ê thoân-thóng
76 tang chêng ê lú-sèng chheng-liân
Kā í-keng pòaⁿ-sio-léng ê pn̄g-oân
Sàng kàu múi 1 ūi ióng-hàn ê chhiú--ni̍h
Chia̍h ji̍p-khì pak-tó͘
Sim--ni̍h ê kám-siū pí chhùi--ni̍h koh-khah un-loán
Ná teh kā gún thê-chhéⁿ
Nā siā-hōe ū put-kong put-gī
Tāi-ke ài kâng-sim lâi cheng-chhú
Khòaⁿ tio̍h chia ê siàu-liân-ke
Cheng-sîn kong-gán, khì-sè pá-tīⁿ
Kì-liām Ji̍t pān liáu bô kui-kang
Lí an-sim tńg-khì chó͘-sian ê hoâi-phāu
Sòa--lo̍h-lâi ê tāi-chì
Gún ē kut-la̍t kè-sio̍k oân-sêng
Kám-siā lí tùi Tâi-oân ê thiàⁿ-sim kap hōng-hiàn
Lán éng-oán ê pō͘-tūi tiúⁿ, Chiong I̍t-jîn sian-seⁿ
Ông E̍k-khái（王奕凱） 作者紹介：
Goân-té tùi chèng-tī chin bô kám-kak, sīm-chì lâng kóng tio̍h chèng-tī
to̍h ē tò-tōaⁿ. Kàu tāi-ha̍k sî-kî (2016 nî) chiah khai-sí hoat-kak
chèng-tī tùi lán seng-oa̍h ū chin tōa ê éng-hióng, chū hit sî mā khai-sí
ùi bûn-jī kā Tâi-gí o̍h--tńg-lâi. 2021 nî khai-sí chiap-chhiok Tâi-bûn
sū-kang, goān-bāng ē-tàng ho̍k-heng Tâi-gí-bûn ê sú-iōng khoân-kéng.
2023 nî ì-sek tio̍h giân-gí sú-iōng ê būn-tê to̍h sī ài ùi ka-tī kóng
tāi-seng, chèng-sek tī chhù--ni̍h choân Tâi-gí kòe ji̍t-chí. Kàu taⁿ
(2024 nî), chhù--ni̍h ùi oân-choân bô lâng chham góa kóng Tâi-gí ê
khoân-kéng, í-keng ùi gún lāu-pē, gún a-má, sòa--lo̍h-lâi liân a-kong to
í-keng koàn-sì hâm góa kóng Tâi-gí, chiâⁿ chò Tâi-gí ka-têng.
Bo̍k-chiân choan-sim tâu-ji̍p Tâi-gí-bûn koh hong-bīn sū-kang, ǹg-bāng
lán Formosa kok cho̍k bó-gí ē-tàng ho̍k-heng. Chhui--lòe! Kâ-yu! Lokah!!
延伸閱讀：
【活動報導全集】司法改革先鋒王育霖詩人檢察官．開像追思會佮台語詩比賽頒獎
【活動手冊】司法改革先鋒王育霖詩人檢察官．開像追思會佮台語詩比賽頒獎
【演奏】桜色舞うころ／櫻花紛飛時（司法改革先鋒王育霖詩人檢察官．開像追思會佮台語詩比賽頒獎）
【短訪】蔡銘軒議員（司法改革先鋒王育霖詩人檢察官．開像追思會佮台語詩比賽頒獎）
【致詞】大地董事長陳俊峰醫師（司法改革先鋒王育霖詩人檢察官．開像追思會佮台語詩比賽頒獎）
【短訪】對囡仔講台語Tùi gín-á kóng Tâi-gí～Lí Bēng-chin（李孟真）（司法改革先鋒王育霖詩人檢察官．開像追思會佮台語詩比賽頒獎）
【花絮】開像、頒獎典禮&彩蛋（司法改革先鋒王育霖詩人檢察官．開像追思會佮台語詩比賽頒獎）
【演奏】望你早歸（司法改革先鋒王育霖詩人檢察官．開像追思會佮台語詩比賽頒獎）
【致詞】王育霖檢察官家屬王克雄博士（司法改革先鋒王育霖詩人檢察官．開像追思會佮台語詩比賽頒獎）
【短訪】李孟修醫師（司法改革先鋒王育霖詩人檢察官．開像追思會佮台語詩比賽頒獎）
【演唱】全心全意愛你．阿美族歡聚歌（司法改革先鋒王育霖詩人檢察官．開像追思會佮台語詩比賽頒獎）
【致詞】台文筆會理事長陳明仁文學家（司法改革先鋒王育霖詩人檢察官．開像追思會佮台語詩比賽頒獎）
